|
SOS ULTIMOS ISPRONES DE GAVOI
(Arrejonu de un'artigianu
cun dunu immaginariu cliente)
Subra sa 'ezza incudine, inue
a chentinas isprones bi hapo fattu
cun sa solita cura, amore e tattu,
como marteddo cun delicadesa
dendelis pesu, forma, cun bellesa,
custos isprones ch'has a ponner tue.
Tue, s'est ch'a s'antiga caddu paras,
cando dés esser mannu e chi los pones
t'has abbizare chi custos isprones
han calchi cosa guasi de majia.
Tando dét esser, tando s'arte mia
chi has apprezziare e totta imparas.
Isprones de Gavoi, fizu amadu,
non sunu totu, no, a nde calzare;
bastat su sonu, senza lu toccare.
chi su caddu s'azzendet e s'avviat;
che chi unu puddedru torra siat
che-i sa die chi l'hana domadu.
Sun gioiellos, non pro mi nd' 'antare,
fattos cun cura e cun pascescia tanta.
Los giughian de goi in Terra Santa
sos antigos crociados zertamente:
beniri apposta da-e continente
e non sempre che nd'hapo a nde lis dare.
Mira! Sa briglia est gai delicada
chi paret impossibile resistat,
eppuru, ti assiguro, firmu s'istat
cale si siat caddu poderosu:
chi crabittinet, chi brinchet fogosu,
restat che impaladu a sa tirada.
Trabaglio a sas istaffas senza pasu
cun dogni attenzione e cun impreu,
comente las faghiat babbu meu
a furi' 'e marteddu e de limare,
e has a bider chi t'han a bistare
che una paja'e iscarpas de rasu.
Tottu cust'est pro te chi lu preparo
deo, ultimu mastru'e terra mia,
eo ch'appenas su passu movia
chi sa prim'istinchidda m'hat brujadu
fattu de babbu. Ma, como, restadu
solu e a niun'imparo.
Ma e tantu proite a imparare
un'arte chi non servit a niunu?
Cuddos caddos de tando inue sunu?
Cuddu trottu lezeru in sas carreras?
Movimentos de festas e curreras
sun solu cosas como 'e ammentare.
E gai, addaju addaju e pista pista,
cust'ultima preparo opera mia:
cun amore, cun arte, fantasia
e orgogliu; orgogliu'e sonniare
si est permissu, nessi in su pensare,
a unu che a mie umile artista!
E marteddo, marteddo e limo, limo
in custas cosas giŕ fora de usu,
ma forsis est pro cussu chi 'e piusu
las tenzo in coro che giau ficcadu:
m'ammentan unu temus chi est passadu
e non podet torrare... E las istimo.
Triulas, 1979 |