...GAVOI NEL CUORE DELLA BARBAGIA... ...PROVINCIA DI NUORO... SARDEGNA... ITALIA
 

Ritorna a Poesie


Alcune Poesie in Sardo tratte dal libro 
"POESIAS IN RIMA SARDA"
di Pietro Lai Urru

BIOGRAFIA
Pietro Lai Urru è nato a Gavoi il 27 luglio 1925.
Terminate le scuole elementari venne avviato precocemente, a soli 12 anni, alla vita del pastore.
Nel 1946 prestò servizio militare di leva a Pesaro, Roma, Bologna, primo incontro con la realtà, molto diversa, delle città del continente.
L'attività del pastore prima, fino al 1954 e del commerciante poi, con l'attuale gestione dell'edicola per giornali, libri e riviste.
Iniziò a cantare e scrivere sin da ragazzo, appassionando i suoi versi dell'evolversi della vita del proprio paese, con le sue gioie e le sue amarezze.

 


ZOVANEDDA LIBERTINA

Cara ninedda mia, ascurta a mie
pro un'istante reffrena s'amore,
oe ses che puzone rie rie
chi da lontanu attiras s'umore.
isconsolada istas calchi die
e pianghes sa pena cun dolore
tue pensas solu a t'ispassare,
ma proas poi su malu operare.

Gia che provas donzi mala sorte
si sos passos non regulas femmìna,
oe chi a donz'unu faghes corte,
accesa in sas fiammas libertina
mantenedi s'onore poverina
s'onestade est su prus gambu forte
prite carinnos che dasa a donz'unu
custu chi tenes est male comunu.

A donz'unu carinnos e affettos
tue los dasa pro t'innamorare,
ma ti carinnana e passan derettos
cha si cheren de tue approffitare
cussos cun tie , non istana suggettos
benini solamente a s'ispassare.
Passan derettos ti faghen visita
tantu pro adempire a sa promita.


A sa promita attende' donz'unu
a cussu logu de cuncentramentu
ti faghe beffas puru callegunu
si zovanedda no istas attentu
non regulas sos passos pro nessunu
apperinde sas alas a su bentu.
Ses ingenua meda e innocente
non ti regulas tue pro niente.

Pro niente ti podes regulare
suggetta ses de ruere in s'errore
ti podiana tottus ammirare
s'esses mantesu su punt'e s'onore
male a pustis ti as'agatare
si zovanedda non pones timore.
e benis iscartada in tottue
si de s'amore, non ti frenas tue.

Anno 1943


SARDIGNA CARA

Sardigna cara non ti connoschimos,
non damus a tue sos valores
ma ses unu tesoro chi tenimos.

Che as tentu membros de onores
de deputados e de presidentes
poetas e diversos iscrittores.

Istudiosos e distintas mentes
tue as dadu e tenes in sinu
diversos personagios eccellentes.

De s'ambiente ses unu giardinu
podias tenner donzia bundade
dae su coerente cittadinu.

In d'una parte b'est brutalidade
andana zente a sequestrare
e los privana de sa libertade.

Sos boscos si ponene brujare
de sa natura ti rendene priva
non ti lassana mancu respirare.

Non podes dare iniziativa
ca s'indelinquenzia est fatale
in su sou settore meda attiva.

Pro te Sardigna cussu est unu male
una dura piaga de curare
chi cosa non s'agattada uguale.

Podias tantu meda cambiare
interveninde sa tua Regione
sos chi as disoccupados, occupare.

Diminuire s'emigrazione,
medas suni' obbligados de partire
a contrariu de s'intenzione.

In terr'anzena andana a finire
orfanados de sos tuos amores
a notte `e die istan'a sufrire.

Industriales e operadores
de sos dirittos los ponnere in gradu
sos pastores e sos agricoltores.

S'isviluppu in te ana isperadu
dande costantemente sos produttos
su tou abitadore alimentadu.

Dare adeguatos contributos
su commerciu a lis garantire
de casu, trigu e ateros fruttos.

Cosa de prus podene battire
si su fruttu est menzus pagadu
los anima' pius de produíre.

S'artigianu sovvenzionadu
chi pottad'in s'arte trabagliare
bastante chi no este cumpensadu.

Benidi obbligadu de serrare
tene' pagu intradas, pagu resas
e troppu sas impostas de pagare.

S'autonomo, sas minores impresas
su lamentu insoro est costante
sende categorias indifesas.

Su cummerciu no' este bastante
troppu crisi e pagu rendimentu
su trabagliu edìle est mancante.

Meda de custos suni' in fallimentu
non podene pius affrontare
cun sas tassas chi faghene ispaventu.

Si podet su turismu incrementare
medas bortas faghene propostas
ma tenen semper de ostacolare.

Villaggios, nuraghes, riccas costas,
casteddos, ispiaggias e marinas
de tantas meraviglias cumpostas.

Iscoglios, gruttas e collinas
domos de janas, lagos de incantu
cun boscos e friscuras montagninas.

Ti bramana chi tue tenes tantu
da su visitadore apprezzada
in donzi logu ti nde dana vantu.

Auguro chi sias rinnovada
chi siada de istimulu sa rima
chi appo iscrittu pro te, isola amada.

In custa rigas dimostro s'istima
da me e da' sos sardos ses in coro
Sardigna cara tue ses sa prima.


A SU TALORO PROMOVIU IN ECCELLENZA

In sa Promozione
Taloro pro chimb'annos ses istadu
as bintu su Girone
e ses in Eccellenza artiadu,
meritu e onore
de Cuccu allenadore,
chi bene at su giogu impostadu.
Su geniu e sa mente
est de Angelo Buttu, Presidente.

Tottu sos giogadores
costantes e attivos sun'istados
portieri e difensores
frequente si sun'impegnados.
Su centru-campu tottu
cun gagliardu mottu,
servidu, an pallones, calíbrados
pro sinzaren costantes
Serra cun sos cumpanzos attaccantes.

Su Direttivu intreu
tenet meritu in tottu s'operadu
s'est postu, in s'impreu
e a Gavoi che ada onoradu.

Su pubblicu as tentu
a donzia momentu
in su Maristiai no' est mancadu
e sos "ultrà" corales
sempere sunístados puntuales.

In d'una poesia
ch'in su novantachimbe ti appo iscríttu,
auguradu t'aìa
menzus trofeu battire a s'abìtu.
Custu s'est avveradu
ses puntuale istadu
Taloro, cun s'ispiritu arditu
rinnovo s'auguru
raggiungas menzus cosas in futuru.

Gavoi 5 giugno 2000


NATURA, CULTURA, PASSIONE

Tenende sa natura
cun sa sua bravura
unu che pode fagher meda tantu
s'impegnada si trattenede
de cosas che ottenede
ca b'este de natura s'impiantu
issa est sa pianta
pro donzia vivente sacrosanta.

Su campu culturale
est meda essenziale
chi meda dada soddisfazione
s'istudiu ispiegada
e donzi cosa legada
t'insegnada e dad'istruzione
issa pro donzi cosa
est'in tottus sos campos operosa.

Si non b'est passione
senza ispirazione
istada donzi donu naturale
senza issa no affrontada
e meda gia' non contada
cà mancada una base essenziale
sa passione est gai
senza issa non faghes nudda mai.

Sa natura est tottu
sa cultura da' mottu
sa passione non deve mancare
custas suni sas cosas
in tottus bisonzosas
chi soddisfaziones poden dare
geniale est sa mente
si est de sas tres cosas possidente.


NON SES CHE PRIMA

Sa moda as cambiadu
bestire indossadu
a gonna curza e a camicetta,
zanchetta a sa maschile
fatta in grand'istile,
lassande perde s'antiga vardetta
ti sese presumida
pensande solu a sa bella vida.

Fis naturale pinta
e rossettos e tinta
de di ponnere gai non creìa
che tue bella luna
non bind'aiada una
e mai a pensare lu podia
invece ses istada
da diversos ismaltos mascherada.

Cussa tua figura
cun tanta cumpostura
hat perdidu s'istile preziadu
gai su ti mirare
che prima non cumpare'
cudda tua bellesa d'altu gradu,
cambiadu as colore
finzas in cuddas laras de amore.

Non prus est naturale
su visu geniale
che rosa de amenu campu elisu
appo iscrittu tantu
dand'isfogu a su cantu
chi cun pinna paperi app'incisu
in tottu trasformada
s'est sa bellesa tua invidiada.


SAS TRIZZAS

Cuddos dorados pilos
intrecciados filos
de oro indianu mi pariana
a sa tua bellesa
fini una grandesa
su visu tou ti adornaiana
solu su los mirare
faghiana su riflessu abbagliare.

Sas trizzas de incantu
de contare a ispantu
dignas unu trofeu meritare
cheriana rispettu
comente in su pettu
che ghirlandas s'idiana falare
cun tantu risplendore
chi faghe' non de pode' su pittore.

Colpiana donzi coro
cuddas trizzas de oro
tott'à intentu in sa tessidura
su mirabile incantu
de contare a ispantu
cantu chi non d'appa fattu sa natura
raresa de mirare
chi paragone non si pode' dare.

Sos pilos dae nou
comm'est s'intentu tou
creschere che a prima los lassare
custu es naturale
non torrana uguale
mancari andes bene los curare
cosa chi penso deo
chi torrene che in prima non lu creo.


Terzinas po s'isquadra 'e calcio Taloro, artià dae
Prima Categoria in Promozione.

(Po sa 'esta de su 10 de lampadas 1995)

Gavoi tottu ganta ses in festa
ca su Taloro at bintu su girone
cun gioia s'eventu manifesta.

Pro su Taloro in promozione
chi ada avanzadu de categoria
brindas orgogliosu cun rejone.

In su novantachimbe resissìa
ses a ottenne' s'istorica impresa
cun s'isquadra de tant'armonia.

S'attaccu, centru campu, sa difesa
su portieri cun modu eccellente
ana mantesu costante s'intesa.

Totore Buttu est su Presidente
Coccone s'espertu allenatore
cun d'unu direttivu eloquente.

Sun arribados tenner cust'onore
sun arribados a s'issoro intentu
dimostrande talentu e ardore.

Sos ultras post'ana s'intendimentu
s'ispettadore est istadu costante
in mesu a sole, nie, abba e bentu

Nende forza Taloro ogni istante,
in sos ispaltos s'est postu in s'impreu
cun boghe sonora inneggiante.

Termino dande s'auguriu meu
Taloro 'e Gavoi sias tue
pius mannu de attire trofeu.


A GAVOI BIDDA MIA
Terzinas

Orgogliosu, in te de esser nadu
dovere custos versos chi t'iscria
Gavoi in sa barbagia situadu

Climatica ses tue bidda mia
a ottighentos metros de altesa
t'attiras da s'istranzu simpatia.

Das ospitalidade ses cortesa,
ti mustras cun tottus tantu umile
ses in duos chilometros distesa.

TERZINA A

Su rosone Pisanu campanile
artisticos de contone in sa collina
fattos da s'arte de antigu istile.

TERZINA B

Mudulu como as su campanile
non dada prus risaltu in sa collina
senza sa punta at perdidu s'istile.

Abba frisca leggera e cristallina
tenes meda granitu aria sana
ses bidda tranquilla montagnina.

Su pastore in s'ierru s'allontana'
a Gaddura, Pranargia e Campidanu
attidi provvistas, casu e lana.

Cando faghede rientru in su beranu
agatada ristoru e dilettu
de S'Itria in su friscu altipianu.

A custa sagra de tantu rispettu
curren su palu da tempus antigu
che benidi zente de donzia cettu.

Sas novinantes invitana s'amigu
dana ospitalidade in muristene
a pigare s'invitu est obbligu.

Sa zente divertinde si trattene'
cun murras, ballos a sonette e tenore
cussa tradizione est riccu bene.

As nuraghes de antigu valore
domos de janas, tumbas de gigante
roccas de formas varias e colore.

Cun su lagu de Gusana invitante
riccu de meda pische prelibadu
piscadore attirada e gitante.

Da sas bellas forestas coronadu
tenes tres ristorantes maestosos
cun tipicos piattos d'altu gradu.

Sa Valasa cun Gusana e Taloro
suni de su turismu su tesoro.





 

Home page  |  Gavoi e il suo territorio  |  Artigianato e Tradizione  |  Associazioni  |   Foto  |  Dove siamo  | 
Feste Paesane  |  Numeri e link utili  | Turismo  |  Poesie e Poeti  |  Stampa e Motori ricerca
  |  Inserzioni  |

PROGETTI ON LINE di Lai Roberto - Gavoi - NU