Addó ‘o barbiere di Vincenzo Cerasuolo (Napoli)    Quanno vaco addò ‘o barbiere, chisà pecchè… ll’oggie addeventa aiere: doppo ca m’ha tagliato ‘sti capille… pare ca ll’anne nun so cchiù chille, ca ‘nzieme a ogne ciocca caduta… ‘na parte d’ ‘o passato se n’è gghiuta   …E me n’esco cu ‘e mane dint’ ‘e ssacche, lassanno ‘int’ ‘o salone ciente acciacche; cammino tutto allero ‘int’ ‘a serata comm’a giuvanettiello ammartenato.   Ma ‘stu miraculo purtroppo dura ‘nfino a che torno dint’ ‘e quatte mura, pecchè, quanno me trovo annanz’ ‘e spiecchie… torna a guardarme chesta faccia ‘e viecchie.