Lo Guarracino
Lo Guarracino che jeva pe' mare
lle venne voglia de se 'nzorare:
Se facette nu bello vestito
de scarede de spine pulito pulito
co na perrucca tutta 'ngrifata
de ziarelle 'mbrasciolata.
Co lo sciabò de scolla e puzine
de ponta angrese fine fine.
Cu li cazune de rezza de funno
scarpe e cazette de pelle de tunno,
e sciammeria e sciammerino
d'aleche e pile de voja marino,
cu buttune e buttunera
d'uocchie de purpo, secce e fera,
fibbia, spata e schiocche 'ndorate
de niro de secce e fele d'achiata.
Ddoje belle cateniglie
de premmone de conchiglie,
no cappiello aggallonato
de codarino d'aluzzo salato
tutto posema e steratiello,
jeva facenno lo sbafantiello,
gerava da ccà e da llà
la 'nnammorata pe' se trovà.
La sardella allo barcone
steva sonanno lo calascione,
e a suono de trommetta
jeva cantanno st'arietta:
"E llarè lo mare e lena
e la figlia d'a si' Lena
ha lassato lo 'nnammorato
pecchè niente l'ha rialato".
Lo Guarracinop 'nche la guardaje
de la sardella s'annammoraje,
se ne jette da na vavosa
la cchiù vecchia maleziosa,
l'ebbe bona rialata
pe' mannarle la 'mmasciata,
la vavosa pisse pisse
chiatto e tunno 'nce li disse.
Si aje voglia de t’allocà
tanta smorfie non aje da fa,
fora le zeze e fora de scuorno
anema a e core e faccia de cuorno”.
Ciò sentenno la si’ sardella
s’affacciaje a la fenestella
fece n’uocchio a zennariello
a lo speruto ‘nnammuratiello.
Ma la patella che steva de posta
la chiammaje faccia tosta,
senza parola, male nata,
ch’avea ‘nchiantato l’alletterato
primmo e antico ‘nnammorato,
de carrera da chisto jette,
e ogne cosa le dicette.
Quanno lo ‘ntise lo poveriello,
se lo pigliaje farfariello,
jette a la casa, s’armaje a rasulose
carrecaje comm’ a nu mulo
de scoppette e de spingarde,
povere, palle, stoppa e scarde,
quattro pistole e tre bajonette
dint’ a la sacca se mettette
‘Ncoppa a li spalle sittanta pistune,
ottanta bomme e novanta cannune,
e comm’ a guappo pallarino
jeva trovanno lo Guarracino,
la disgrazia a chisto portaje
che ‘nmiezo a la chiazza te lo ‘ncontraje
se l’afferra p’ o cravattino
po’ lle dice “ah malandrino!
tu mme lieve la ‘nnammorata
e pigliatella sta mazziata”
Tuffete taffete a miliunelle
deva pacchere e secazzune,
schiaffe, ponie e perepesse,
scoppolune, fecosse e connesse,
scerevecchiune e sicutennosse
e l’ammacca osse e pilosse.
Venimmoncenne ch’ a lo rommore
pariente e amice ascettera fore,
chi co’ mazze, cortielle e cortelle,
chi co’ spate spatune e spatelle,
chiste co’ barre, chille co’ spite,
chi co’ ammennole e chi co’ antrite,
chi co’ tenaglie e chi co’ martielle,
chi co’ torrone e sosamielle.
Patre, figlie, marite e mogliere
s’azzuffajeno comm’ a fere.
A meliune correvano a strisce
de sto partito e de chille li pisce.
Che bediste de sarde e d’alose!
de palaje e raje petrose!
Sarache, dientece ed achiate,
scurme, tunne e alletterate!
Pisce palumme, piscatrice,
scuorfane cernie e alice,
mucchie, riggiole, musdee e mazzune,
stelle, aluzze e storiune,
merluzze, ruòngole e murene,
capodoglie orche e vallene,
capitune, aùglie e arenghe,
ciefare, cuocce, tracene e tenghe.
Treglie, tremmole, trotte e tunne
fiche, cepolle, laune e retunne,
purpe, secce e calamare,
pisce spate e stelle de mare,
pisce palumme e pisce martiello,
voccadoro e cecenielle,
capochiuove e guarracine,
cannolicchie, ostreche e ancine.
Vòngole, cocciole e patelle,
piscecane e grancetielle,
marvizze màrmure e vavose,
vope prene, verole e spose,
spìnole, spuònole, sierpe e sarpe,
scàuze, ‘nzuoccole e co’ le scarpe,
sconciglie, gàmmere e ragoste,
vennero ‘nfino co’ le
poste.
Capitune sàure e anguille,
pisce gruosse e piccerille,
d’ogne ceto e nazione,
tantille, tante, cchiù tante e tantone!
Quanta botte, mamma mia!
Che se dèvano, arrassosia!
A centenare le barrate!
A meliune le petrate!
Muorzeche e pizzeche a beliune!
A deluvio le secuzzune!
Non ve dico che bivo fuocose
faceva per ogne luoco!
Ttè, ttè, ttè, ccà pistulate!
Ttà, ttà, ttà, llà scoppettate!
Ttù, ttù, ttù, ccà li pistune!
Bbù, bbù, bbù llà li cannune!
Ma de cantà so già stracquato,
e me manca mò lo sciato,
sicchè dateme licenzia,
graziosa e bella audienzia,
‘nfì che sorchio na meza de seje,
co’ salute de luje e de leje,
ca se secca lu cannarone
sbacantànnose lo premmone.